Մի քանի օր առաջ Գերմանիայի Դաշնային Հանրապետությունը ապրեց իր պատմության ամենասարսափելի բնական աղետներից մեկը։ Տարբեր դաշնային նահանգներ տուժել են ջրհեղեղից։ Վնասը հատկապես մեծ է եղել Հյուսիսային Ռեյն-Վեստֆալիայում և Ռեյնլանդ-Պֆալցում: Այս սարսափելի բնական աղետի հետևանքով զոհվել է մոտ 170 մարդ։ Շատ մարդիկ դեռ անհայտ կորած են համարվում։

Ողջ երկրում տիրող համերաշխության ոգին ուրախալի է և հուսադրող։ Բազմաթիվ հաստատություններ և անհատներ իրենց նվիրատվություններով օգնում են վերացնել այս տարերային աղետի հետևանքները։ Գերմանական Հայոց թեմը նույնպես որոշել է մասնակցել դրամահավաքին և այսօր իր համեստ միջոցներից 2000 եվրո է նվիրաբերել ջրհեղեղի աղետի օգնության հիմնադրամին։

Թող Աստված օգնի բոլոր տուժածներին:

Հայ Եկեղեցու թեմի դիվանատուն
Գերմանիայում